आना दाई वो तोर बेटा बलावत हे
तोर अचरा के छइंहा खातिर तोला गोहरावत हे
आना दाई वो आ ना
आना दाई वो आ ना
भाई-भाई खून के प्यासा
दिखत हमरो नासा हे
आस उड़ागे ये दुनिया के
मोला अब तोरे आसा हे
आना दाई वो आ ना
आना दाई वो आ ना
झन कर अबेर वो दाई
बड़े बिपत के बेरा हे
मोह माया के जग बंधना
संउहत काल के डेरा हे
आना दाई वो आ ना
आना दाई वो आ ना
ताल लय सूर बोली भाखा
तोर किरपा ले पाये हंव
नव दिन नव राति मईया
तोरे सेवा ल गाये हंव
आना दाई वो आ ना
आना दाई वो आ ना
-एमन दास ‘अंजोर’
बने हन के बासी खा ले रे नंगरिहा
चिखला माटी के मजा तभे आही
बने तान के तैहां गा ले रे ददरिया
चिखला माटी के मजा तभे आही
गारे पसीना मिहनत के,
तोर अबिरथा नै जावय
नांगर धरे बिन जांगर थकथे,
फल करम बिन नै पावय
उतर डोली म जीनगी जंग हे,
अऊ जोत दे तय कतको हरिया
चिखला माटी के मजा तभे आही
तन माटी हे मन माटी,
माटी बिना मन नै लागय
माटी म माटी मिलथे तब
जीनगी जनम हा नीक लागय
पुरवज के परताप हे तोर कर
ढिल दे पिरित छलकै नरवा
चिखला माटी के मजा तभे आही
बने हन के,,,
एमन दास 'अंजोर'
हो रे सावन,
छतिया ल मारे बजुर बान।
उमर घुमर बरसे कारिया रे बादर
हिरदे ल करय हलाकान ।। रे सावन।।
पाना पतेवना के भाग हरियाये
घुर घुर माटी के छूटत हे परान।। रे सावन।।
कांदी उगे हस रे कट जाबे एक दिन
हंसिया के धार जीनगी जान।। हो रे सावन।।
